A UDC organiza un curso de verán sobre descarbonización industrial e tecnoloxías CAUC

A Universidade da Coruña acollerá os vindeiros 14 e 15 de xullo o curso de verán “Descarbonización Industrial e Tecnoloxías de Captura, Transporte, Almacenamento e Uso do CO₂: Unha Visión Atlántica”, organizado polo Laboratorio de Mecánica de Rochas (LaMeRoc), integrado no Centro de Innovación Tecnolóxica en Edificación e Enxeñaría Civil (CITEEC).

A formación desenvolverase na Escola Técnica Superior de Enxeñaría de Camiños, Canais e Portos da UDC e centrará a súa atención nas tecnoloxías CAUC (Captura, Almacenamento, Transporte e Uso do CO₂), consideradas ferramentas clave para avanzar cara a unha descarbonización efectiva da industria.

O curso pretende, por unha banda, dar a coñecer as iniciativas que se están a desenvolver en Galicia no ámbito das tecnoloxías CAUC, promovendo a reflexión sobre os perfís profesionais emerxentes, as oportunidades e os retos que deben abordarse tanto desde a comunidade académica como desde o tecido industrial. Por outra banda, busca mostrar como un contexto rexional apoiado por políticas públicas aliñadas está a favorecer o impulso de proxectos e iniciativas industriais de grande envergadura, nos que a descarbonización se perfila como un horizonte económico e empresarial de alto valor engadido.

O curso está coordinado por Jordi Delgado Martín, integrante do Grupo de Enxeñaría da Auga e do Medio Ambiente (GEAMA), e conta tamén coa colaboración da Plataforma Tecnolóxica Española do CO₂, cuxo presidente, Pedro Mora Peris, participará nas sesións programadas. Ambas xornadas contarán con intervencións de referentes autonómicos e nacionais no ámbito das CAUC.

A actividade está aberta a toda a comunidade e contempla diferentes modalidades de matrícula, que inclúen a cobertura de gastos de desprazamento e dietas. As persoas interesadas deberán formalizar a súa inscrición a través da ligazón habilitada para este fin.

Programa Completo