María del Mar Alonso López

A Dra. María del Mar Alonso López é científica titular de Organismo Público de Investigación (OPI) no Departamento de Materiais do Instituto de Ciencias da Construción Eduardo Torroja (IETcc), pertencente ao Consello Superior de Investigacións Científicas (CSIC).

A área de investigación de María del Mar Alonso xira arredor do estudo dos sistemas cementantes. En particular, as súas principais liñas de investigación céntranse no desenvolvemento de novos materiais cementantes ecoeficientes (incluíndo a transformación de residuos e subprodutos industriais e de residuos de construción e demolición en recursos mediante a súa reutilización, o estudo da radioactividade natural de residuos e subprodutos empregados na preparación de cementos de distinta natureza, e o desenvolvemento de materiais de construción alternativos aos cementos portland convencionais con características de ecoeficiencia enerxética e ambiental) e, por outra banda, no estudo da reoloxía de sistemas cementantes (destacando a análise do efecto de aditivos para o formigón na reoloxía de sistemas cementantes, o estudo da compatibilidade de aditivos superplastificantes cos compoñentes do formigón, a determinación de isotermas de adsorción en cementos, e a determinación do comportamento reolóxico en sistemas de cementos portland convencionais e cementos, morteiros e formigóns ecoeficientes).

María del Mar Alonso é autora de polo menos 46 artigos en revistas científicas indexadas, así como de 5 capítulos de libros. Foi investigadora en 6 proxectos nacionais (dous deles como investigadora principal), en 2 programas de axudas á I+D de interese rexional da Comunidade Autónoma de Madrid, nun proxecto europeo e noutro proxecto internacional. Tamén participou en 17 contratos de investigación con empresas nacionais (4 deles como IP) e en 8 contratos con empresas internacionais. Foi directora de 4 teses doutorais finalizadas e dunha en execución.

María del Mar Alonso tamén é integrante do comité de xestión e/ou científico de diversos congresos nacionais e internacionais, así como directora do Consello de Redacción da revista científica “Materiales de Construcción” desde 2019 ata a actualidade. Ademais, é avaliadora de traballos científicos en múltiples revistas do SCI/WOS, avaliadora de proxectos do Plan Nacional de Investigación e xefa do Departamento de Materiais do Instituto de Ciencias da Construción Eduardo Torroja.