Elia Alonso Rodríguez

Doutora en Química pola Universidade de Santiago de Compostela. Bolseira durante catro anos no Instituto Xeolóxico e Mineiro de España (Madrid). Desde 2003, son Catedrática na área de Química Analítica da Universidade da Coruña, con seis quinquenios de docencia.

A miña actividade investigadora céntrase en:

1. Desenvolvemento de métodos analíticos para a determinación de metais en matrices biolóxicas, materiais xeolóxicos, augas naturais e residuais, produtos de combustión e materias primas de centrais eléctricas.

2. Especiación de As e Se en mostras ambientais e biolóxicas mediante técnicas acopladas.

3. Desenvolvemento de métodos de química verde para a extracción de metais maioritarios, traza e especies organometálicas de As e Se en material biolóxico mariño.

4. Avaliación da influencia de fontes antropoxénicas, mariñas e terrestres na composición da auga de choiva e partículas atmosféricas, e a súa caracterización mediante a determinación de ións maioritarios e metais traza.

5. Estudos in vitro da biodispoñibilidade humana de metais traza en alimentos, plásticos e microplásticos.

Publiquei máis de 50 artigos en revistas internacionais avaliados positivamente en catro sexenios de investigación e participei en máis de 20 proxectos de investigación de ámbito europeo, nacional e autonómico.