Carmen María Moscoso Pérez

Carmen Mª Moscoso Pérez é licenciada en Ciencias Químicas pola Universidade de Santiago de Compostela (1998) e doutora en Química pola Universidade da Coruña (2003). Realizou o seu doutoramento baixo a supervisión dos profesores Jorge Moreda Piñeiro, Esther Fernández Fernández e Darío Prada Rodríguez. Posteriormente, obtivo unha bolsa postdoutoral na Unidade de Espectrometría de Plasma-Masas dos Servizos de Apoio á Investigación (SAI) da UDC. Tamén traballou como analista de laboratorio en SGS, Española de Control, onde levou a cabo análise de compostos químicos utilizando técnicas avanzadas como HPLC-MS, GC-MS e ICP-MS.

Con máis de 20 anos de experiencia en investigación, especializouse na análise de contaminantes ambientais e a caracterización de microplásticos. Participou en numerosos proxectos de investigación, contribuíndo á publicación de gran cantidade de artigos en revistas internacionais e un libro, e foi relator en múltiples congresos. Ademais, conta con experiencia docente. A súa traxectoria valeulle o Premio de Investigación Ernesto Viéitez Cortizo en 2023.

Actualmente, é parte do Grupo de Química Analítica Aplicada (QANAP) na Universidade da Coruña, centrando a súa investigación en contaminantes ambientais, microplásticos, validación de métodos analíticos, sustentabilidade e avaliación de riscos.